Ламжавын Цэндсүрэн

Монгол Улсын гавъяат жүжигчин Ламжавын Цэндсүрэн гуайн талаар цөөн зүйлийг хэлье. Ламжавын Ванган хэмээх алдарт зохиолчийн өргөмөл дүү Цэндсүрэн гуай "Хүргэн хүү"-ийн Жамцын эхнэр, "Тунгалаг Тамир"-ын Итгэлтийн эхнэр зэрэг монгол киноны толгой баячуудын эхнэрт тоглож байсан буянтан гэдгийг та бүхэн сайн мэднэ. Л.Цэндсүрэн гуай 1926 онд Говь-Алтай аймгийн Цээл суманд төржээ. Урлагийн сургууль төгсөөд л Улсын Хүүхэд Залуучуудын Театрт хуваарилагдан очиж жүжигчнээр ажилласаар өндөр насны тэтгэвэрт гартлаа тус театрт олон арван жүжигт тоглож байсан юм. Эдүгээ 95 насыг зооглож байгаа Цэндсүрэн гавъяатдаа эрүүл энхийг хүсэж, зуу наслаж зургаадай алтан хаяг тулаарай гэж ерөөе өө.