Галсанбалдангийн Аахүү

Монгол кино үйлдвэрийн бас нэгэн авъяаслаг уран бүтээлчийг танилцуулъя. Галсанбалдангийн Аахүү 1948 онд төрсөн. Аахүү ах анх кино үйлдвэрт туслах найруулагчаар ажилд орж байсан бол хожим нь мундаг зургийн дарга болсоон. Учир нь түүний аав Галсанбалдан гуай манай алтан үеийн туршлагатай зургийн дарга байсан юм. Киноны зургийн дарга гэхээр хүмүүс гайхдаг. Кино уран бүтээлийн санхүү, аж ахуйн бүх ажлыг гардаг хариуцдаг хүн гэсэн үг л дээ. Өөрөөр хэлбэл уран бүтээлчдийг уран бүтээлээс бусад зүйлд санаа зовохгүй ажиллах боломжийг бүрдүүлж өгдөг тулхтай алба юм шүү. Аахүү ах "Зарлаагүй дайны оршил", "Нандин эрдэнэ", "Үлгэр дууссан хойно" гэх мэт олон киног бүтээлцсэн хөөн. Би энэ удаа Аахүү ахын ажилласан бүх киноны нэрийг дурьдаж чадаагүйдээ хүлцэл өчиж байна. Ном товхимолд жүжигчид, уран бүтээлчдийг л дурьддаг болохоос арын албаныханыг дурьддаггүй нь харамсалтай. Үүнээс хойж үзсэн кино бүрийнхээ зургийн дарга нарыг тэмдэглэж авах ёстой юм байна. Аахүү дарга ажлаа сайн гүйцэтгэхээс гадна чадварлаг жүжигчин юм шүү. 85 жилийн түүхтэй "Монголкино" үйлдвэрийн ахмад ажилтан Г.Аахүү ахдаа эрүүл энх байж, урт удаан аз жаргалтай амьдрахыг хүсэн ерөөе.