Лувсанбалдангийн Лувсан

Халх голын дайнд сөнөөгч онгоцны нисгэгч байсан хүн Багаяад тоглосон нь сонин. БНМАУ-ын Гавъяат жүжигчин Лувсанбалдангийн Лувсан гуай урлагт орохынхоо өмнө нисэхийн сургууль төгсөөд Баян-Түмэнд байлдаж явсан ахмад дайчин билээ. Л.Лувсан гуай 1908 онд Төв аймгийн Баянцогт суманд төрсөн хүн юм. 1940 онд Төв театрт жүжигчнээр орсоноос хойш бүх насаа урлагтай холбожээ. Лувсан гуай арван хүүхдийн эцэг бөгөөд хүү Нямсүрэн нь жүжигчин болж "Намар нахиалсан мод" кинонд аавынхаа тоглосон Шагдарын залуу насны дүрд тоглосон юм. Жүжигчин Нямсүрэнг та бүхэн "Тань руу нүүж явна" киноны хүү Дарьсүрэнгийн дүрээр нь сайн таних билээ. Лувсан гуайн бэр, Нямсүрэнгийн гэргий Я.Оюунцэцэг мөн л жүжигчин хүн байсаан. Харамсалтай нь эдгээр жүжигчид өнөөдөр бидний дунд байхгүй ч кино дэлгэцэн дээр амьдарсаар л байгаа билээ.